Ymysg yr enillwyr mae Gemma Waite, sy’n astudio athroniaeth, moeseg a chrefydd ym Mhrifysgol Bangor. Enillodd Gemma, sy’n ei thrydedd flwyddyn, wobr Merêd – sy’n cydnabod cyfraniad myfyriwr i'r bywyd a'r diwylliant Cymraeg, o fewn prifysgol ac yn ehangach.
Cyhoeddwyd yr enillwyr mewn seremoni yng Nghanolfan S4C yr Egin, Caerfyrddin ddydd Iau, 19 Mehefin.
Mae’n anrhydedd ac yn fraint ennill gwobr Merêd. Mae'n hyfryd gwybod bod yr holl waith rydw i wedi'i wneud tra yn y brifysgol nid yn unig yn cael ei gydnabod, ond hefyd yn cael ei werthfawrogi. Mae’r wobr yma wedi agor cyfleoedd newydd ar gyfer y dyfodol, ac am hynny, rwy’n ddiolchgar.
Fel cynrychiolydd cwrs, dwi wedi gwneud hi’n flaenoriaeth i gynrychioli myfyrwyr Cymraeg, boed hyn o rhan materion cwrs, materion cymdeithasol neu cynnig cefnogaeth pan fo angen. Dwi wedi Ǿ’r cyfle i fod yn gynrychiolydd cwrs a gweithio gyda myfyrwyr eraill, darlithwyr a’r brifysgol yn ehangach er mwyn ceisio sicrhau bod profiad myfyrwyr wrth galon bywyd yn y brifysgol.
Yn bennaf, hoffwn ddiolch i fy ddarlithwyr am yr holl gyfleoedd dwi wedi eu derbyn, heb y cyfleoedd yma ni fyddwn wedi cyflawni’r holl brofiadau dwi wedi eu derbyn.”
Wedi graddio, bydd Gemma yn dychwelyd i Fangor ym mis Medi i astudio MPhil ym moeseg a chrefydd. Yn ystod ei chyfnod ym Mangor, fe gafodd y fraint o weithio gyda’r Ganolfan Cenedlaethol Addysg Grefyddol Cymru ar y ‘Broject Heddwch’, ble creodd adnoddau ar gyfer myfyrwyr blwyddyn 7-9 ysgol uchwardd, ar wahanol agweddau o heddwch. Roedd yr agweddau hyn yn cynnwys heddwch a chrefydd, cyfiawnder cymdeithasol, a gweithgareddau rhyngweithiol er mwyn ysbrydoli pobl ifanc i feddwl yn fwy am y pwnc. Fe enillodd y project Heddychwyr Ifanc gan y Ganolfan Materion Rhyngwladol Cymru ac Academi Heddwch Cymru yn Eisteddfod Llangollen yn 2024.
Mae wedi bod yn fraint cael cefnogi Gemma drwy gydol ei hastudiaethau. Mae ei deallusrwydd a’i hangerdd dros athroniaeth drwy’r Gymraeg yn adleisio’n berffaith ag etifeddiaeth Merêd - dyna pam ro'n i'n awyddus i'w henwebu. Ac roedd cael bod yn Yr Egin yn gweld Gemma'n derbyn y wobr gan Archdderwydd cyfredol Cymru, Mererid Hopwood, yn bleser enfawr, yn enwedig a hithau hefyd yn heddychwr gweithgar. Dwi'n edrych ymlaen yn arw at barhau i gefnogi Gemma gyda'i hastudiaethau ôl-radd.
Mae llwyddiant Gemma yn adlewyrchu’r gorau y gall ein myfyrwyr anelu tuag ato: chwilfrydedd deallusol, ymrwymiad moesegol a chysylltiad dwfn â’r gymuned a’r diwylliant. Mae ei brwdfrydedd dros addysg drwy gyfrwng y Gymraeg a’i chyfraniad eithriadol at waith academaidd ac estyn allan yn ei gwneud yn dderbynnydd teilwng iawn o Wobr Merêd. Rydym yn hynod falch ohoni.
Mae Gemma yn haeddu canmoliaeth a chydnabyddiaeth am ei gwaith a’i chyfraniad tuag at addysg Gymraeg a dwyieithog yn y sector addysg uwch. Mae hi’n codi proffil a statws y Gymraeg yn ei sefydliad ac yn arddel y safonau uchaf. Diolchwn iddi am ei gwaith a dymunwn bob llwyddiant iddi tuag at y dyfodol.
